8-222-సీ.
భూతాత్మ! భూతేశ! భూత భావనరూప! ;
దేవ! మహాదేవ! దేవవంద్య!
యీ లోకముల
కెల్ల నీశ్వరుండవు నీవ;
బంధమోక్షములకుఁ బ్రభుఁడ వీవ;
యార్త శరణ్యుండ వగు గురుండవు నిన్నుఁ;
గోరి భజింతురు కుశలమతులు;
సకల సృష్టిస్థితిసంహారకర్తవై;
బ్రహ్మ విష్ణు శివాఖ్యఁ బరఁగు దీవ;
8-222.1-ఆ.
పరమ గుహ్య మయిన బ్రహ్మంబు సదసత్త
మంబు నీవ శక్తిమయుఁడ వీవ;
శబ్దయోని వీవ; జగదంతరాత్మవు
నీవ;
ప్రాణ మరయ నిఖిలమునకు.
టీకా:
భూతాత్మ = పరమశివ
{భూతాత్ముడు - పంచభూతములకు ఆత్మయైనవాడు,
శివుడు}; భూతేశ = పరమశివ {భూతేశుడు -
భూతములకు ఈశుడు (పతి),
శివుడు}; భూతభావనరూప = పరమశివ {భూతభావనరూపుడు - జీవులకు
కారణరూపమైనవాడు,
శివుడు}; దేవ = పరమశివ;
మహాదేవ = పరమశివ {మహాదేవుడు - మహా
(గొప్ప) దేవుడు,
శివుడు}; దేవవంద్య = పరమశివ {దేవవంద్యుడు - దేవతలచే వంద్యుడు
(స్తుతింపబడువాడు),
శివుడు}; ఈ = ఈ; లోకముల్ = లోకముల;
ఎల్లన్ = అన్నిటికి;
ఈశ్వరుండవు = భగవంతుడవు;
నీవ = నీవే;
బంధ = బంధములకు;
మోక్షముల్ = ముక్తుల;
కున్ = కు; ప్రభుడవు = విభుడవు;
నీవ = నీవే;
ఆర్త = దుఃఖించెడివారికి;
శరణ్యుండవు =
శరణము ఇచ్చువాడవు;
అగు = అయిన;
గురుండవు = గొప్పవాడవు;
నిన్నున్ = నిన్ను;
కోరి = కోరి; భజింతురు = సేవించెదరు;
కుశలమతులు = జ్ఞానులు;
సకల = సమస్తమైన;
సృష్టి =
సృష్టి; స్థితి = స్థితి;
సంహార = లయ;
కర్తవు = కారణుడవు;
ఐ = అయ్యి; బ్రహ్మ =
బ్రహ్మదేవుడు;
విష్ణు = విష్ణుమూర్తి;
శివ = పరమశివుడు;
ఆఖ్యన్ = పేర్లతో;
పరగుదు = ప్రకాశించెడివాడవు;
ఈవ = నీవే.
పరమ = అత్యధికమైన;
గుహ్యము = రహస్యము;
అయిన = ఐన; బ్రహ్మంబు = బ్రహ్మము;
సత్ = సత్తు;
అసత్ =
అసత్తులతో; తమంబు = కూడినవాడవు;
నీవ = నీవే;
శక్తిమయుడవు = శక్తియుక్తుడవు
{శక్తి - 1సత్త్వ 2రజస్ 3తమస్సులు}; ఈవ = నీవే; శబ్దయోనివి = శబ్దమునకు
జన్మస్థానమవు;
జగత్ = లోకమంతటికి;
ఆత్మవు = అంతరాత్మవు;
నీవ = నీవే;
ప్రాణము =
జీవము; అరయ = తరచిచూసినచో;
నిఖిలమున్ = సమస్తమున;
కు = కు.
భావము:
“ఓ పరమేశ్వరా! పంచ భూతాలకూ ఆత్మ అయిన వాడా! సర్వ భూతాలకూ
అధినాథా! జీవులకు కారణమైన రూపమైన దేవా! ఓ దైవమా! మహాదేవా! దేవతలకు వందనీయుడా! ఈ లోకాలు అన్నిటికి ప్రభువు నీవే; సంసారబంధాలలో పడుట, మోక్షమూ ఏది అనుగ్రహించాలన్నా నీవల్లనే
సాధ్యం అవుతుంది; జ్ఞానులు ఆర్తులకు శరణు ఇచ్చేవాడూ, ఆదిగురువు అయిన నిన్ను కోరి ప్రార్థిస్తారు; సృష్టి, స్థితి, సంహార కార్యాలు సమస్తమునకు కారణ భూతుడవు అయి; బ్రహ్మ విష్ణు శివ పేర్లుతో విరాజిల్లుతుంటావు; భావానికి అందని పరబ్రహ్మవు; సదసద్రూప పరమాత్మవూ నీవే;
శక్తి యుక్తుడవు నీవే; శబ్దానికి జన్మస్థానం అయిన శబ్దబ్రహ్మము నీవే; లోకానికి అంతరాత్మవు నీవే; సర్వ చరాచరాలకు ప్రాణము నీవే;
: :చదువుకుందాం భాగవతం; బాగుపడదాం మనం అందరం: :
No comments:
Post a Comment