శ్రీ కృష్ణాష్టమీ శుభాకాంక్షలు.

మా నల్లనయ్య మన అందరికి సకల సుఖ-సంతోషాలు, ఆయురారోగ్యాలు, భోగభాగ్యాలు అనుగ్రహించు గాక.

10.1-112-సీ.

జలధరదేహు నాజానుచతుర్బాహు; సరసీరుహాక్షు విశాలవక్షుఁ

జారు గదా శంఖ చక్ర పద్మ విలాసుఁ; గంఠకౌస్తుభమణికాంతిభాసుఁ

గమనీయ కటిసూత్ర కంకణ కేయూరు; శ్రీవత్సలాంఛనాంచిత విహారు

నురుకుండలప్రభాయుత కుంతలలలాటు; వైడూర్యమణిగణ వరకిరీటు 

10.1-112.1-తే.

బాలుఁ బూర్ణేందురుచిజాలు భక్తలోక; పాలు సుగుణాలవాలుఁ గృపావిశాలుఁ

జూచి తిలకించి పులకించి చోద్య మంది; యుబ్బి చెలరేఁగి వసుదేవు డుత్సహించె.

టీకా:

బాలున్ = చిన్నపిల్లవానిని; పూర్ణ = నిండు; ఇందు = జాబిల్లి; రుచి = మెరుపులు; చాలు = చాలాకలవానిని; భక్త = భక్తులు; లోక = అందరను; పాలున్ = కాపాడువానిని; సుగుణ = మంచిగుణములకు {సుగుణములు - శమము దమము శాంతము సర్వజ్ఞత్వము మున్నగు మంచిగుణములు}; అలవాలము = ఉనికిపట్టైనవానిని; చూచి = కనుగొని; తిలకించి = చూసి; పులకించి = సంతోషించి; చోద్యమంది = అబ్బురపడి; ఉబ్బి = ఉప్పొంగి; చెలరేగి = విజృంభించి; వసుదేవుడు = వసుదేవుడు; ఉత్సహించెన్ = ఉత్సాహముచెందెను.

10.1-112-see.

jaladharadehu naajaanuchaturbaahu; saraseeruhaakShu vishaalavakShuM~

jaaru gadaa shaMkha chakra padma vilaasuM~; gaMThakaustubhamaNikaaMtibhaasuM~

gamaneeya kaTisootra kaMkaNa keyooru; shreevatsalaaMchhanaaMchita vihaaru

nurukuMDalaprabhaayuta kuMtalalalaaTu; vaiDooryamaNigaNa varakireeTu

10.1-112.1-tE.

baaluM~ boorNeMduruchijaalu bhaktaloka; paalu suguNaalavaaluM~ gRipaavishaaluM~

joochi tilakiMchi pulakiMchi chodya maMdi; yubbi chelareM~gi vasudevu DutsahiMche.

భావము:

ఆ బాలుడు దివ్యరూపంతో వసుదేవునికి దర్శనమిచ్చాడు. అతడు నీలమేఘ వర్ణ దేహం కలిగి ఉన్నాడు; (మోకాళ్ళ వరకు) పొడవైన నాలుగు చేతులలో గద శంఖం చక్రం పద్మం వెలుగొందుతున్నాయి; తామరరేకుల వంటి కళ్ళు, విశాలమైన వక్షం ఉన్నాయి; కంఠంలో కౌస్తుభమణి కాంతులు వెలుగుతున్నాయి; అందమైన మొలతాడు, కంకణాలు, భుజకీర్తులు ధరించి ఉన్నాడు; శ్రీవత్సము అనే పుట్టుమచ్చ వక్షం మీద మెరుస్తున్నది; చెవికుండలాల కాంతితో ముంగురులు వెలిగిపోతున్నాయి; వైడూర్య మణులు పొదగిన కిరీటం ధరించి ఉన్నాడు; పూర్ణచంద్రుని కాంతులీనుతున్నాడు.; అతడు భక్తులందరిని రక్షించే వాడు; సృష్టిలోని సగుణాల పోగు; అతి విశాలమైన కరుణ కలవాడు; వసుదేవుడు ఆ హరిని కనుగొని చూసి పులకించి, ఆశ్చర్యంతో మైమరచి ఉప్పొంగి, ఉబ్బితబ్బిబయ్యాడు. 

(http://telugubhagavatam.org/?Details&Branch=anuyuktaalu&Fruit=Tool_Of_Lord_Vishnu)

శ్రీ మహావిష్ణువు ఆయుధాలు

(http://telugubhagavatam.org/?tebha&Skanda=10.1&Ghatta=11)

: :చదువుకుందాం భాగవతం; బాగుపడదాం మనం అందరం: :