కృష్ణలీలలు

10.1-265-కంద పద్యము

సుడి యెఱుఁగని హరి సుడివడ

సుడిగాలి తెఱంగు రక్కసుఁడు విసరెడి యా

సుడిగాలి ధూళి కన్నుల

సుడిసిన గోపకులు బెగడి సుడివడి రధిపా!

          కష్టం అంటే తెలియని చంటిపిల్లాడు కృష్ణుడుని చిక్కుపడేయాలని తృణావర్తుడనే రాక్షసుడు సుడిగాలి రేపాడు. ఆ విసురుకి లేస్తున్న దుమ్ముకు కళ్ళు కమ్ముకోగా గోపకులు బెదిరి గాబరా పడ్డారు.

          సుడి సుడి అని ఏడుసార్లు ప్రయోగించి. ఎంతో చమత్కారం చూపారు పొతన్న గారు. 

10.1-265-kaMda padyamu

suDi yeRruM~gani hari suDivaDa

suDigaali teRraMgu rakkasuM~Du visareDi yaa

suDigaali dhooLi kannula

suDisina gOpakulu begaDi suDivaDi radhipaa!

          సుడి = చలింప జేయబడు టన్నది; ఎఱుగని = తెలియని; హరిన్ = విష్ణుమూర్తి; సుడివడన్ = చుట్టబెట్టికొని పోవలె నని; సుడిగాలి = సుడిగాలి; తెఱంగు = వంటి; రక్కసుండు = రాక్షసుడు; విసరెడి = బలంగా వీస్తున్న; ఆ = ఆ; సుడిగాలి = సుడిగాలి యొక్క; ధూళిన్ = దుమ్ము; కన్నులన్ = కళ్ళలో; సుడిసినన్ = చుట్టుముట్టగా; గోపకులు = యాదవులు; బెగడి = భయపడిపోయి; సుడువడిరి = చుట్టచుట్టుకుపోయిరి; అధిపా = రాజా.

http://telugubhagavatam.org/?tebha&Skanda=10.1&Ghatta=35&Padyam=265.0

: : చదువుకుందాం భాగవతం; బాగుపడదాం; మనం అందరం : :