కృష్ణలీలలు

10.1-292-కంద పద్యము

చూడని వారల నెప్పుడు

జూడక లోకములు మూఁడు చూపులఁ దిరుగం

జూడఁగ నేర్చిన బాలక

చూడామణి జనుల నెఱిఁగి చూడఁగ నేర్చెన్.

         ఊర్థ్వ, అధో, భూలోకాలు మూటిని తన కనుసన్నలలో నడుపే ఆ శ్రీహరి, భక్తిలేక తనని లెక్కచేయని వారి ఎడల దయచూపడు. అట్టి శ్రీహరి శైశవశ్రేష్ఠు డైన కృష్ణుడుగా కళ్ళు తిప్పుతు చుట్టుపక్కలవారిని చూసి గుర్తుపట్ట నారంభించాడు.

10.1-292-kaMda padyamu

chooDani vaarala neppuDu

jooDaka lOkamulu mooM~Du choopulaM~ dirugaM

jooDaM~ga nErchina baalaka

chooDaamaNi janula neRriM~gi chooDaM~ga nErchen.

          చూడని = భక్తిలేక తనని లెక్కచేయని; వారలన్ = వారిని; ఎప్పుడును = ఏ సమయమునందును; చూడక = దయచూడకుండ; లోకములున్ = లోకములు {ముల్లోకములు - 1భూలోకము 2స్వర్గలోకము 3పాతాళలోకము}; మూడున్ = మూడింటిని; చూపులన్ = తన ఆజ్ఞప్రకారము; తిరుగన్ = నడచునట్లుగ; చూడగన్ = చేయుట; నేర్చిన = తెలిసిన; బాలక = బాలురలో; చూడామణి = శ్రేష్ఠుడు (తలపైనిమణివలె); జనులన్ = చుట్టుపక్కలవారిని; ఎఱిగి = ఆనమాలుపట్టి; చూడగన్ = చూచుటను; నేర్చెన్ = నేర్చుకొనెను.

http://telugubhagavatam.org/?tebha&Skanda=10.1&Ghatta=39&Padyam=292.0

: : చదువుకుందాం భాగవతం; బాగుపడదాం; మనం అందరం : :