ప్రహ్లాద చరిత్ర - సంసారజీమూతసంఘంబు

7-171-సీస పద్యము

సంసారజీమూతసంఘంబు విచ్చునే? ; చక్రిదాస్యప్రభంజనము లేక;

తాపత్రయాభీలదావాగ్ను లాఱునే? ; విష్ణుసేవామృతవృష్టి లేక;

సర్వంకషాఘౌఘజలరాసు లింకునే? ; హరిమనీషాబడబాగ్ని లేక;

ఘనవిపద్గాఢాంధకారంబు లడగునే? ; పద్మాక్షునుతిరవిప్రభలు లేక;

7-171.1-తేటగీతి

నిరుపమాపునరావృత్తి నిష్కళంక

ముక్తినిధిఁ గానవచ్చునే? ముఖ్యమైన

శార్ఙ్గకోదండచింతనాంజనము లేక

తామరసగర్భునకు నైన దానవేంద్ర!

            రాక్షసేశ్వరా! గుంపులు కట్టిన కారు మబ్బులు పెద్ద గాలి ప్రభంజనంలా విసరక పోతే విడిపోవు కదా. అలాగే చక్రధారి అయిన విష్ణుమూర్తి సేవ లేకుండా సంసార బంధాలు తొలగిపోవు. శ్రీహరి కైంకర్యం అనే అమృతపు వాన జల్లు కురవక పోతే, సంసారాటవిలో చెలరేగే తాపత్రయాలు అనే భయంకరమైన దావాగ్ని చల్లారదు. బడబాగ్ని ప్రజ్వల్లితే సముద్రాలు కూడా ఇంకిపోతాయి. అలాగే శ్రీపతి చింతన ఉత్తేజమైతే సముద్రం లాగ అంతటా ఒరుసుకుంటూ ఉండే పాపలన్నీ పటాపంచలై పోతాయి. సూర్యుని కిరణాలు తాకితే ఎంతటి చీకటి తెరలైనా విడిపోతాయి. అలాగే కేశవ కీర్తనతో ఎంతటి విపత్తులు చుట్టుముట్టినా విరిగిపోతాయి. మహా నిధులు గుప్తంగా ఉంటాయి. అంజనం ఉంటే వాటిని కనుగొనగలం. (శార్ఙ్గం అనే ఖడ్గం కోదండం అనే విల్లు ధరిస్తాడు విష్ణువు.) విష్ణుభక్తి అనే అంజనం ఉంటే కాని నిర్మలమైన, నిరుపమానమైన, పునర్జన్మ లేని ముక్తి అనే పెన్నిధి అందుకోడం ఎవరికీ సాధ్యం కాదు. నాన్నగారూ! ఆఖరికి ఆ బహ్మదేవుడికి అయినా సరే ఇది తప్ప మార్గాంతరం లేదు.

           సంసార = సంసారము యనెడి; జీమూత = మబ్బుల; సంఘంబు = సమూహము; విచ్చునే = విడిపోవునా ఏమి; చక్రి = నారాయణుని; దాస్య = కైంకర్యము యనెడి; ప్రభంజనము = పెనుగాలి; లేక = లేకుండగ; తాపత్రయ = తాపత్రయములు యనెడి {తాపత్రయము - 1ఆధ్యాత్మికము 2ఆదిభౌతికము 3అధిదైవికము అనెడి బాధలు}; ఆభీల = భయంకరమైన; దావాగ్నులు = కారుచిచ్చులు; ఆఱునే = ఆరిపోవునా ఏమి; విష్ణు = నారాయణుని; సేవా = సేవ యనెడి; అమృత = అమృతపు; వృష్టి = వర్షము; లేక = లేకుండగ; సర్వంకష = ఎల్లెడలను నిండిన; అఘ = పాపముల; ఓఘ = సముదాయములనెడి; జలరాసులు = సముద్రములు; ఇంకునే = ఇంకిపోవునా ఏమి; హరి = నారాయణుని; మనీషా = ప్రజ్ఞ యనెడి; బడబాగ్ని = బడబాగ్ని; లేక = లేకుండగ; ఘన = గొప్ప; విపత్ = ఆపదలనెడి; గాఢ = చిమ్మ; అంధకారంబుల్ = చీకటులు; అడగునే = నశించునా ఏమి; పద్మాక్షున్ = నారాయణుని {పద్మాక్షుడు - పద్మములను పోలెడి అక్షుడు (కన్నులుగలవాడు), విష్ణువు}; నుతి = స్తోత్రము యనెడి; రవి = సూర్యుని; ప్రభలు = కాంతులు; లేక = లేకుండగ.

          నిరుపమా = సాటిలేని; అపునరావృత్తిన్ = తిరిగిరానివిధమైన; నిష్కళంక = నిర్మలమైన; ముక్తినిధిన్ = మోక్షపదవిని; కానన్ = చూచుటకు; వచ్చునే = అలవియా ఏమి; ముఖ్యము = ముఖ్యము; ఐన = అయిన; సార్ఙ్గకోదండ = నారాయణుని {సార్ఙ్గకోదండడు - సార్ఙ్గ్యము యనెడి ఖడ్గము కోదండము యనెడి విల్లు మొదలగు ఆయుధములు గలవాడు, విష్ణువు}; చింతన = ధ్యానము యనెడి; అంజనము = కాటుక; లేక = లేకుండగ; తామరసగర్భున = బ్రహ్మదేవుని {తామరసగర్భుడు - పద్మమునందు పుట్టినవాడు, బ్రహ్మ}; కున్ = కు; ఐనన్ = అయినను; దానవేంద్ర = రాక్షసరాజా.

७-१७१-सीस पद्यमु

संसारजीमूतसंघंबु विच्चुने? ; चक्रिदास्यप्रभंजनमु लेक;

तापत्रयाभीलदावाग्नु लार्रुने? ; विष्णुसेवामृतवृष्टि लेक;

सर्वंकषाघौघजलरासु लिंकुने? ; हरिमनीषाबडबाग्नि लेक;

घनविपद्गाढांधकारंबु लडगुने? ; पद्माक्षुनुतिरविप्रभलु लेक;

७-१७१.१-तेटगीति

निरुपमापुनरावृत्ति निष्कळंक

मुक्तिनिधिँ गानवच्चुने? मुख्यमैन

शार्ङ्गकोदंडचिंतनांजनमु लेक

तामरसगर्भुनकु नैन दानवेंद्र!

http://telugubhagavatam.org/?tebha&Skanda=7&Ghatta=6&Padyam=171.0

: :చదువుకుందాం భాగవతం; బాగుపడదాం మనం అందరం: :