కృష్ణలీలలు

10.1-364-సీస పద్యము

బాలుఁ డీతండని భావింతు నందునా; యే పెద్దలును నేర రీక్రమంబు

వెఱ పెఱుంగుటకు నై వెఱపింతు నందునా; కలిగి లే కొక్కఁడుగాని లేఁడు

వెఱపుతో నా బుద్ధి వినిపింతు నందునా; తనుదాన యై బుద్ధిఁ దప్పకుండు

నొండెఱుంగక యింట నుండెడి నందునా; చొచ్చి చూడని దొకచోటు లేదు

10.1-364.1-ఆటవెలది

తన్ను నెవ్వరైనఁ దలపోయఁ బాఱెడి

యోజ లేదు భీతి యొక టెఱుంగఁ

డెలమి నూరకుండఁ డెక్కసక్కెము లాడుఁ

బట్టి శాస్తిజేయు భంగి యెట్లు?

10.1-365-వచనము

అని వితర్కించి.

         కన్నయ్యని పోనీ పసిపిల్లాడులే అనుకుందామంటే, ఇలాంటి నడవడి పెద్దలకు ఎవరికి తెలియదు; పోనీ ఇతడికి కొద్దిగా భయం చెబ్దాం అనుకుందామంటే, లేకలేక పుట్టినవాడు వీడొక్కడే మరోడు లేడాయె; బెదిరించి బుద్ధులు నేర్పుదాం అంటే, తనంతట తనే బుద్ధిగా ఉంటున్నాడాయె; అలాగనీ ఏమి తెలియకుండా ఇంట్లో కూర్చుంటాడులే అనుకుంటే, వీడు వెళ్ళని చూడని చోటేదీ లేనే లేదాయె; తనని ఎవరైనా చూస్తే పారిపోదామనే ఆలోచనే కూడా వీడికి రాదు; అసలు భయం అన్నదే తెలియదు; మళ్ళీ ఊరికే ఉండడు, ఎకసెక్కాలాడుతూనే ఉంటాడు; వీణ్ణి పట్టుకొని తగిన శాస్తి చేయటం ఎలా?

         కన్నయ్యకు బుద్ధి చెప్పటం ఎలా అని ఆలోచించుకుంటోంది

10.1-364-సీ.

10.1-364-seesa padyamu

baaluM~ DeetaMDani bhaaviMtu naMdunaa; yE peddalunu nEra reekramaMbu

veRra peRruMguTaku nai veRrapiMtu naMdunaa; kaligi lE kokkaM~Dugaani lEM~Du

veRraputO naa buddhi vinipiMtu naMdunaa; tanudaana yai buddhiM~ dappakuMDu

noMDeRruMgaka yiMTa nuMDeDi naMdunaa; chochchi chooDani dokachOTu lEdu

10.1-364.1-aaTaveladi

tannu nevvarainaM~ dalapOyaM~ baaRreDi

yOja lEdu bheeti yoka TeRruMgaM~

Delami noorakuMDaM~ Dekkasakkemu laaDuM~

baTTi shaastijEyu bhaMgi yeTlu?

10.1-365-vachanamu

ani vitarkiMchi.

          బాలుడు = పిల్లవాడు; ఈతండు = ఇతను; అని = అని; భావింతునందునా = అనుకొందామంటే; ఏ = ఎలాంటి; పెద్దలును = పెద్దవారుకూడ; నేరరు = చేయలేరు; ఈక్రమంబున్ = ఈ విధముగా; వెఱపున్ = భయము; ఎఱుంగుటకు = చెప్పుటకు; ఐ = కోసము; వెఱపింతును = భయపెట్టెదను; అందునా = అనుకొందామంటే; కలిగిలేక = లేకలేక; ఒక్కడు = ఇతడొక్కడే; కాని = తప్పించి; లేడు = మరొకడులేడు; వెఱపు = భయపెటుట; తోన్ = తోటి; నా = నా యొక్క; బుద్ధిన్ = మంచిబుద్ధిని; వినిపింతున్ = చెప్పెదను; అందునా = అనుకొందామంటే; తనున్ = తనంతట; తాన = తానే; ఐ = ఉండి; బుద్ధిన్ = మంచిబుద్ధిని; తప్పకుండున్ = క్రమముగానుండును; ఒండున్ = ఇతరవిషయములేవీ; ఎఱుంగక = తెలిసికొనకుండ; ఇంటన్ = ఇంట్లోనే; ఉండెడిన్ = ఉండుము; అందునా = అనుకొందామంటే; చొచ్చి = దూరి; చూడనిది = చూడనట్టిది; ఒక = ఒక్కటైనా; చోటు = స్థలము; లేదు = లేదు.

            తన్నున్ = అతనిని; ఎవ్వరైనన్ = ఎవరైనాసరే; తలపోయెన్ = తలచుకొనినచో; పాఱెడి = పరిగెట్టిపోయెడి; ఓజ = విధము; లేదు = లేదు; భీతి = భయము; ఒకటెఱుంగడు = అసలులేదు; ఎలమిన్ = చక్కగా; ఊరకుండడు = ఊరుకోడు; ఎకసక్కెములు = వంకరమాటలు; ఆడున్ = పలుకును; పట్టి = పట్టుకొని; శాస్తి = తగినశిక్ష; చేయన్ = చేయవలసిన; భంగి = విధము; ఎట్లు = ఏమిటి.

http://telugubhagavatam.org/?tebha&Skanda=10.1&Ghatta=53

: : చదువుకుందాం భాగవతం; బాగుపడదాం; మనం అందరం : :