తెలుగు భాగవత తేనె సోనలు – 259

సప్తాబ్దంబుల

2-187-శా.

సప్తాబ్దంబుల బాలుఁడై నిజభుజాస్తంభంబునన్ లీలమై

సప్తాహంబులు శైలరాజము లసచ్ఛత్త్రంబుగాఁ దాల్చి, సం

గుప్తప్రాణులఁ జేసె మాధవుఁడు గోగోపాలక వ్రాతమున్

సప్తాంభోధి పరీతభూధరున కాశ్చర్యంబె చింతింపఁగన్.

          శ్రీకృష్ణుడు ఏడేళ్ళ బాలుడై ఉన్నా ఏడు రోజులు పాటు స్తంబాలలాంటి తన భుజాలపై అలవోకగా గోవర్థనగిరిని ఓ చక్కటి గొడుగులాగ ఎత్తి పట్టుకున్నాడు. గోవులను గోపాలకులను దాని మరుగున దాచి అందరి ప్రాణాలను రక్షించాడు. సప్తసముద్రాలతో చుట్టబడి ఉండే భూమి నంతటిని ధరించిన ఆ పరమపురుషునికి ఇది వింత పనేం కాదు.

2-187-Saa.

saptaabdaMbula baalu@MDai nijabhujaastaMbhaMbunan leelamai

saptaahaMbulu Sailaraajamu lasachChattraMbugaa@M daalchi, saM

guptapraaNula@M jaese maadhavu@MDu gOgOpaalaka vraatamun

saptaaMbhOdhi pareetabhoodharuna kaaScharyaMbe chiMtiMpa@Mgan.

          సప్త = ఏడు; అబ్దంబులన్ = సంవత్సరాల (వయసున్న); బాలుఁడు = బాలకుడు; ఐ = అయ్యి ఉండి; నిజ = తన; భుజ = భుజము అను; స్తంభంబునన్ = స్తంభము మీద; లీలమై = లీలతో; సప్త = ఏడు; అహంబులున్ = దినములు; శైల = పర్వతములలో; రాజమున్ = గొప్పదానిని; లసత్ = తళుకుల; ఛత్రంబు = గొడుగు; కాన్ = అయినట్లు, వలె; తాల్చి = ధరించి; సంగుప్త = బాగుగా దాచబడిన; ప్రాణులఁన్ = జీవులను; చేసెన్ = చేసెను; మాధవుఁడు = కృష్ణుడు {మాధవుడు - మాధవి భర్త, భగవంతుడు}; గో = గోవుల; గోపాలక = గోపకుల; వ్రాతమున్ = సమూహములను; సప్త = ఏడు; అంభోధిన్ = సముద్రముల; పరీత = పర్యంతమైన; భూ = భూమిని; ధరున్ = ధరించువాని; కిన్ = కి; ఆశ్చర్యంబె = ఆశ్చర్యకర మైన పనా; చింతింపగన్ = ఆలోచించి చూస్తే.

http://telugubhagavatam.org/products.php?psid=699&catid=6&scatid=12&ccatid=

~~~|సర్వేజనాః సుఖినోభవంతు|~~~