తెలుగు భాగవత తేనె సోనలు – 249

శ్రీమహిత

3-1-క.

శ్రీమహిత వినుత దివిజ

స్తోమ! యశస్సీమ! రాజసోమ! సుమేరు

స్థేమ! వినిర్జితభార్గవ

రామ! దశాననవిరామ! రఘుకులరామా

          శ్రీరామా! శ్రీకరమైన మహిమ కలవాడ! దేవతలుచే సంస్తుతింపబడు వాడ! దిగ్దిగంతాల వరకు వ్యాపించే యశస్సు కలవాడ! చంద్రుని వలె చల్లని పరిపాలన చేయువాడ! మేరునగ ధీరుడ! పరశురాము డంతటి వాని విచిత్రంగా భంగపరచిన శూరుడ! పదితలల రావణాసురుని తుదముట్టించిన వీరాధివీరుడ! రఘువంశోద్ధారక రామ! అవధరించు.

3-1-ka.

Sreemahita vinuta divija

stOma! yaSasseema! raajasOma! sumaeru

sthaema! vinirjitabhaargava

raama! daSaananaviraama! raghukularaamaa

          శ్రీ = శుభకర మైన; మహిత = మహిమ కలవాడ; వినుత = పొగడబడుతున్న; దివిజ = దేవతల {దివిజులు - స్వర్గమున ఉండువారు, దేవతలు}; స్తోమ = సమూహముకలవాడ; యశః = కీర్తికి; సీమ = హద్దు యైనవాడ; రాజ = రాజులలో; సోమ = చంద్రుడా; సుమేరు = మేరుపర్వతము వలె; స్థేమ = స్థిరమైన స్వభావము కలవాడ; వినిర్జిత = చక్కగా జయింపబడిన; భార్గవరామ = పరశురాముడు కలవాడ {భార్గవ రాముడ - భర్గుని యొక్క రాముడు}; దశానన = రావణుని {దశానన - పది తలలు కలవాడు, రావణుడు}; విరామ = సంహరించిన వాడ; రఘుకులరామ = రఘురామ {రఘు కుల రాముడు - రఘు వంశపు రాముడు}.

http://www.telugubhagavatam.org/products.php?psid=713&catid=6&scatid=13&ccatid=

~~~|సర్వేజనాః సుఖినోభవంతు|~~~