శ్రీకృష్ణ విజయము - 271

( ప్రద్యుమ్న వివాహంబు )

10.2-283-చ.

చని పురిఁజొచ్చి వృష్ణికులసత్తముఁ డచ్చట మూఁగియున్న య

మ్మనుజవరేణ్యనందనుల మానము దూలి భయాకులాత్ము లై

చనఁగ ననేక చండతర సాయకసంపదఁ జూపి రుక్మి నం

దనఁ గొనివచ్చి వేడ్క నిజధామము సొచ్చె నవార్యశౌర్యుఁ డై.

10.2-284-వ.

ఇట్లు తెచ్చి ప్రద్యుమ్నుండు హరినయనం బరిణయంబంది నిఖిల సుఖంబు లనుభవింపుచుండె; యనంతరంబ.

10.2-285-క.

ధీరుఁడు కృతవర్ముని సుకు

మారుఁడు వరియించె రుచిరమండనయుత నం

భోరుహముఖి రుక్మిసుతం

జారుమతీకన్యఁ బ్రకటసజ్జనమాన్యన్.

భావము:

అలా కుండిన నగరంలో ప్రవేశించిన ఆ ప్రద్యుమ్నుడు వృష్ణివంశోత్తముడు, అక్కడ చేరిన రాజకుమారులపై తీవ్రమైన బాణాలు ప్రయోగించి తన పరాక్రమాన్ని ప్రదర్శించాడు. ఆ రాకుమారులు ధైర్యం కోల్పోయి భయంతో పారిపోయారు. ప్రద్యుమ్నుడు అవక్ర పరాక్రముడై మేనమామ రుక్మి పుత్రిక రుక్మవతిని తన నగరానికి తీసుకుని వచ్చాడు, ఆ విధంగా ఆ హరిణాక్షి రుక్మవతిని తన నగరానికి తెచ్చిన ప్రద్యుమ్నుడు ఆమెని వివాహమాడి, సకల సౌభాగ్యాలను అనుభవిస్తున్నాడు. రుక్మి మరొక కుమార్తె పద్మముఖి సజ్జన సమ్మాన్య “చారుమతి”ని ధీరుడైన కృతవర్మ కుమారుడు వివాహమాడాడు.

http://telugubhagavatam.org/?tebha&Skanda=10.2&Ghatta=29&Padyam=285

: : తెలుగులో మాట్లాడుకుందాం : :

: : భాగవతం చదువుకుందాం : :