రుక్మిణీకల్యాణం – ఎవ్వని దేశమం దునికి

24- ఉ.

ఎవ్వని దేశమం దునికి యెవ్వనిచేఁ గుశలంబు గల్గు మీ

కెవ్వని రాజ్యమందుఁ బ్రజలెల్ల సుఖింతురు వాఁడు మత్ప్రియిం

డివ్వనరాశి దుర్గమున కే లరుదెంచితి రయ్య! మీరు? లే

నవ్వులుగావు; నీ తలఁపునం గల మే లొనరింతు ధీమణీ.”

బుద్దిశాలీ! మీరే దేశంలో ఉంటారు. ఎవని రాజ్యంలో నైతే మీరు కులాశాగా ఉంటారో, ప్రజ లంతా సుఖంగా ఉంటారో వాడు మాకు ఇష్టుడు. సముద్రంలో ఉన్న ఈ కోట లోకి రావటం అంత సుళువైన పని కాదు. మీరెలా వచ్చేరు. మీరు కోరిన మేలు తప్పక చేకూరుస్తాను.” అని శ్రీకృష్ణుడు సందేశం పట్టుకొచ్చిన విప్రుని పలకరించాడు.

24- u.

evvani dEshamaM duniki yevvanichEM~ gushalaMbu galgu mee

kevvani raajyamaMduM~ brajalella sukhiMturu vaaM~Du matpriyiM

Divvanaraashi durgamuna kE larudeMchiti rayya! meeru? lE

navvulugaavu; nee talaM~punaM gala mE lonariMtu dheemaNee.”

          ఎవ్వని = ఎవరి; దేశము = రాజ్యము; అందున్ = లో; ఉనికి = ఉండుట; ఎవ్వని = ఎవరి; చేన్ = వలన; కుశలంబున్ = క్షేమము; కల్గున్ = కలుగును; మీ = మీ; కున్ = కు; ఎవ్వని = ఎవరి; రాజ్యము = రాజ్యము; అందున్ = లో; ప్రజలు = జనులు; ఎల్లన్ = అందరు; సుఖింతురు = సుఖించెదరు; వాడు = అతడు; మత్ = నా యొక్క; ప్రియుండు = ఇష్టుడు; ఈ = ఈ; వనరాశి = సముద్రపు; దుర్గమున్ = కోటకు; కున్ = కు; ఏల = ఎట్లు; అరుదెంచితిరి = వచ్చిరి; అయ్య = తండ్రి; మీరున్ = మీరు; లే = లేత; నవ్వులు = నవ్వులకు; కావు = చెప్పినవికావు; నీ = నీ యొక్క; తలపునన్ = మనసునందు; కల = ఉన్న; మేలున్ = మంచివాటిని; ఒనరింతున్ = చేసెదను; ధీమణీ = విఙ్ఞులలో ఉత్తముడా.

http://telugubhagavatam.org/?tebha&Skanda=10.1&Ghatta=204&Padyam=1702

: : చదువుకుందాం భాగవతం; బాగుపడదాం; మనం అందరం  : :