రుక్మిణీకల్యాణం – మలఁగున్

54- వ.

మఱియును.    

55- మ.

మలఁగున్ మెల్లని గాలికిం; బటునటన్మత్తద్విరేఫాళికిం

దలఁగుం; గోయల మ్రోఁతకై యలఁగు; నుద్యత్కీర సంభాషలం

గలఁగున్; వెన్నెలఁవేడిమిం నలఁగు; మాకందాంకురచ్ఛాయకుం

దొలఁగుం; గొమ్మ మనోభవానలశిఖాదోధూయ మానాంగియై.

          ఇంకా మన్మథతాపాగ్నిలో వేగిపోతున్న మగువ పిల్లగాలికి అలసి పోతుంది. దోగాడే తుమ్మెదలకి తొలగిపోతుంది. కోయిల కూసినా చిరాకు పడుతుంది. చక్కటి చిలక పలుకులకి ఉలికి పడుతుంది. వెన్నెల వేడికి వేగిపోతుంది. మామిడి చెట్టు నీడకి తప్పుకుంటుంది.

54- va.

maRriyunu.     

55- ma.

malaM~gun mellani gaalikiM; baTunaTanmatta dvirEphaaLikiM

dalaM~guM; gOyalamrOM~takai yalaM~gu; nudyatkeera saMbhaaShalaM

galaM~gun; vennelaM~vEDimiM nalaM~gu; maakaMdaaMkura chhaayakuM

dolaM~guM; gomma manObhavaanalashikhaadOdhooya maanaaMgiyai.

          మఱియును = ఇంతేకాకుండా.

          మలగున్ = చలించును; మెల్లని = మెల్లగా వీచెడి; గాలి = గాలి; కిన్ = కి; పటు = మిక్కలి; నటత్ = చరించుచున్న; ఉన్మత్త = మత్తుగొన్న; ద్విరేఫా = తుమ్మెదల {ద్విరేఫము - తన పేరైన భ్రమరమునందు రెండు రేఫలు (రవత్తులు) కలది, రేఫ (రవత్తు) వంటి రెక్కలు రెండు కలది, తుమ్మెద}; ఆళి = సమూహమున; కిన్ = కు; తలగున్ = తప్పుకొనును; కోయిల = కోకిల; మ్రోత = కూతల; కై = వలన; అలగున్ = చిరాకుపడును; ఉద్యత్ = పుట్టుచున్న; కీర = చిలుకల; సంభాషలం = పలుకులకు; కలగున్ = కలతపడును; వెన్నెల = వెన్నెల యొక్క; వేడిమిన్ = తాపమునకు; నలగున్ = బడలికచెందును; మాకంద = తియ్యమామిడి; అంకుర = చిగుర్ల; ఛాయకున్ = నీడకు; తొలగున్ = తప్పించుకొనిపోవును; కొమ్మ = ఇంతి; మనోభవ = మన్మథ {మనోభవ - మనసునందు పట్టువాడు, మన్మథుడు}; అనల = అగ్ని యొక్క; శిఖా = మంటలచేత; దోధూయమాన = చలింపజేయబడిన; అంగి = దేహము కలామె; ఐ = అయ్యి.

http://telugubhagavatam.org/?tebha&Skanda=10.1&Ghatta=205&Padyam=1734.0

: : చదువుకుందాం భాగవతం; బాగుపడదాం; మనం అందరం  : :