తెలుగు భాగవత తేనె సోనలు – 405

శంకర భక్తమానసవశంకర

10.2-315-ఉ.

శంకర! భక్తమానస వశంకర! దుష్టమదాసురేంద్ర నా

శంకర! పాండునీలరుచి శంకర వర్ణ నిజాంగ! భోగి రా

ట్కంకణ! పార్వతీహృదయకైరవ కైరవమిత్ర! యోగిహృ

త్పంకజ పంకజాప్త! నిజ తాండవఖేలన! భక్తపాలనా!

          శంకరా! సుఖములు కలుగజేసెడి వాడ! భక్తుల మనసులను వశంచేసుకొనువాడ! దుష్టులు మదోన్మత్తులు నైన రాక్షసులను నశింపజేయు వాడ! శుభకరము లైన రంగులు తెలుపు దేహమున, నీలము కంఠమున ప్రకాశించు వాడ! సర్ప భూషణుడా! పార్వతీ దేవి హృదయ పద్మమునకు చంద్రుని వంటి వాడ! యోగిజనుల హృదయ కమలములకు సూర్యునివంటి వాడ! తాండవ ప్రియుడా! భక్తులను పరిపాలించు వాడా!

బాణాసురుడు పరమశివుని ఇలా స్తుతిస్తున్నాడు. ఆహా! పోజరాజా! ఏమి అలంకారాలు చేసావయ్యా శంకరుడుకి భక్తవశంకరుడుకి.

10.2-315-u.

SaMkara! bhaktamaanasa vaSaMkara! dushTamadaasuraeMdra naa

SaMkara! paaMDuneelaruchi SaMkara varNa nijaaMga! bhOgi raa

TkaMkaNa! paarvateehRdayakairava kairavamitra! yOgihR

tpaMkaja paMkajaapta! nija taaMDavakhaelana! bhaktapaalanaa!

          శంకర = శివుడు {శంకరుడు - శుభమును చేయువాడు, శివుడు}; భక్తమానస వశంకర = శివుడు {భక్తమానస వశంకరుడు - భక్తుల మనసులను వశపరచు కొనువాడు, శివుడు}; దుష్టమ దాసురేంద్ర నాశంకర = శివుడు {దుష్టమ దాసురేంద్ర నాశంకరుడు - దుర్మార్గులైన రాక్షసరాజులను నాశనము చేయువాడు, శివుడు}; పాండు నీల రుచి శంకరవర్ణ నిజాంగ = శివుడు {పాండు నీల రుచి శంకరవర్ణ నిజాంగుడు - పాండు (తెలుపు) నీల (నలుపు) రుచి (కాంతులచే) శంకర (శుభము కలుగజేయుచున్న) వర్ణ (రంగులు కల) నిజ (తన) అంగ (దేహము కలవాడు), శివుడు}; భోగి రాట్కంకణ = శివుడు {భోగి రాట్కంకణుడు - భోగిరాట్ (సర్పరాజు, వాసుకి) కంకణముగా కలవాడు, శివుడు}; పార్వతీ హృదయకైరవ కైరవమిత్ర = శివుడు {పార్వతీ హృదయకైరవ కైరవమిత్రుడు - పార్వతి మనస్సు అను కైరవ (తెల్ల కలువకు) కైరవమిత్రుడు (చంద్రుడు వంటి వాడు), శివుడు}; యోగిహృత్పంకజ పంకజాప్త = శివుడు {యోగిహృత్పంకజ పంకజాప్తుడు - యోగుల హృదయములను పంకజ (పద్మముల)కు పంకజాప్తుడు (సూర్యుని వంటి వాడు), శివుడు}; నిజతాండవ ఖేలన = శివుడు {నిజతాండవ ఖేలనుడు - నిజ (స్వకీయమైన) తాండవమను నాట్యమును ఖేలన (ఆడు వాడు), శివుడు}; భక్తపాలనా = శివుడు {భక్తపాలనుడు - భక్తులను పాలించువాడు, శివుడు}.

http://telugubhagavatam.org/?tebha&Skanda=10.2&Ghatta=31

~~~|సర్వేజనాః సుఖినోభవంతు|~~~