రుక్మిణీకల్యాణం – తమకుం గాలము

83- మ.

తమకుం గాలము మంచిదైన మనలం ద్రైలోక్య విఖ్యాతి వి

క్రములన్ గెల్చిరి యాదవుల్ హరి భుజా గర్వం బునన్ నేడు; కా

లము మేలై చనుదెంచెనేని మనమున్ లక్షించి విద్వేషులన్

సమరక్షోణి జయింత; మింతపనికై శంకింప నీకేటి కిన్.

          ఇవాళ వారికి కాలం అనుకూలమైంది. ముల్లోకాలలో ప్రసిద్దికెక్కిన మనల్ని కృష్ణుడి అండతో యాదవులు జయించారు. కాలం కలిసొస్తే మనం కూడ పగవారిని యుద్దం లో పడగొడతాం. ఇంతోటి దానికి విచారించడం ఎందుకు.”

83- ma.

tamakuM gaalamu maMchidaina manalaM drailOkya vikhyaati vi

kramulan gelchiri yaadavul hari bhujaa garvaM bunan nEDu; kaa

lamu mElai chanudeMchenEni manamun lakShiMchi vidvEShulan

samarakShONi jayiMta; miMtapanikai shaMkiMpa neekETi kin.

               తమ = వారి; కున్ = కి; కాలము = కాలము; మంచిది = అనుకూలమైనది; ఐన = కాగా; మనలన్ = మనలను; త్రైలోక్య = ముల్లోకములకు; విఖ్యాతి = ప్రసిద్ధిచెందిన; విక్రములన్ = పరాక్రమము కలవారిని; గెల్చిరి = జయించిరి; యాదవుల్ = యదువంశమువారు; హరి = కృష్ణుని; భుజా = భుజబలము యొక్క; గర్వంబునన్ = అతిశయముచేత; నేడు = ఇవాళ; కాలము = కాలము; మేలు = మనకి అనుకూలము; ఐ = అయ్యి; చనుదెంచినేని = వచ్చినచో; మనమున్ = మనముకూడ; లక్షించి = గురిపెట్టి; విద్వేషులన్ = శత్రువులను; సమరక్షోణిన్ = యుద్ధభూమిలో; జయింతము = గెలుతుము; ఇంత = ఇంతమాత్రపు; పని = విషయము; కై = కోసము; శంకింపన్ = సంకోచపడుట; నీవు = నీ; కున్ = కు; ఏటికిన్ = ఎందుకు.

http://telugubhagavatam.org/?tebha&Skanda=10.1&Ghatta=208&Padyam=1762.0

: : చదువుకుందాం భాగవతం; బాగుపడదాం; మనం అందరం: :