శ్రీ కృష్ణ విజయము - 59

( కంసుడు దుశ్శకునముల్గనుట )

10.1-1300-క.

ఆ రేయి గోపయుతులై

క్షీరాన్నముఁ గుడిచి రామకృష్ణులు మదిఁ గం

సారంభ మెఱిఁగి యిష్ట వి

హారంబుల నప్రమత్తులై యుండి రిటన్

10.1-1301-క.

తన పురికి రామకృష్ణులు

చనుదెంచి నిజానుచరులఁ జంపుటయు మహా

ధనువుఁ గదిసి విఱుచుటయును

విని కంసుఁడు నిద్రలేక విహ్వలమతియై.

భావము:

రామకృష్ణులు ఆ రాత్రి గోపకులతో కలసి పాలబువ్వ తిని కంసుడి ప్రయత్నాలన్నీ మనసున ఎరిగిన వారై, యథేచ్ఛా విహారాలలో ఆ నగరోపవనంలో జాగరూకతతో ఉండి గడిపారు. కంసుడు తన పట్టణానికి బలరామకృష్ణులు రావటమూ, తన అనుచరులను సంహరించడమూ, అంత గొప్ప ధనుస్సును విరిచివేయడమూ విన్నాడు. అతనికి నిద్రపట్టలేదు మనసు కలతబారింది.

http://telugubhagavatam.org/?tebha&Skanda=10.1&Ghatta=152&padyam=1301

: : భాగవతం చదువుకుందాం : : 

: : తెలుగులో మాట్లాడుకుందాం : :