శ్రీ కృష్ణ విజయము - 29

( వ్రేతలు కలగుట )

10.1-1220-క.

పురసతుల విలోకనములు

సరసాలాపములు నర్మసంభోగములున్

మరిగి హరి మనల నొల్లఁడు;

నరవరు లో! యమ్మ! నూతనప్రియులు గదే.

10.1-1221-క.

పుట్టెన్నఁడు హరి నెఱుఁగని

పట్టణసుందరుల కితనిఁ బతిఁ జేసి కడున్

దట్టపు విరహాగ్నులకును

గట్టిఁడి దైవంబు ఘోషకాంతల వెదకెన్.

భావము:

నగరంలోని నీటుకత్తెల చూపులూ, సరస సంభాషణలూ, తెరచాటు కలయికలూ మరిగి, ఓ యమ్మా! మన మాధవుడు మనని చూడడే. భూపతులు క్రొత్తవాటినే కోరుతుంటారు కదే. క్రూరపు దైవం పుట్టింది మొదలు కృష్ణుణ్ణి ఎప్పుడూ చూసి ఎరుగని ఆ పట్టణ పడచులకేమో అతగాణ్ణి పతిగా చేసాడు. మిక్కుటమైన వియోగాగ్నికి ఆహుతి గావించడం కోసమేమో గొల్లపల్లె గోపికలను వెదకి పట్టు కొన్నాడు.”

http://telugubhagavatam.org/?tebha&Skanda=10.1&Ghatta=140&padyam=1221

: : భాగవతం చదువుకుందాం : : 

: : తెలుగులో మాట్లాడుకుందాం : :