శ్రీకృష్ణ విజయము - 221

( సత్యభామ యుద్ధంబు )

10.2-177-సీ.

సౌవర్ణ కంకణ ఝణఝణ నినదంబు-

  శింజినీరవముతోఁ జెలిమి సేయఁ

దాటంక మణిగణ ధగధగ దీప్తులు-

  గండమండలరుచిఁ గప్పికొనఁగ

ధవళతరాపాంగ ధళధళ రోచులు-

  బాణజాలప్రభాపటలి నడఁప

శరపాత ఘుమఘుమశబ్దంబు పరిపంథి-

  సైనిక కలకల స్వనము నుడుప

10.2-177.1-తే.

వీర శృంగార భయ రౌద్ర విస్మయములు

గలసి భామిని యయ్యెనో కాక యనఁగ

నిషువుఁ దొడుగుట దివుచుట యేయుటెల్ల

నెఱుఁగరా కుండ నని సేసె నిందువదన.

10.2-178-మ.

పరుఁ జూచున్ వరుఁ జూచు నొంప నలరింపన్, రోషరాగోదయా

విరతభ్రూకుటి మందహాసములతో వీరంబు శృంగారమున్

జరగం; గన్నులఁ గెంపు సొంపుఁ బరఁగం జండాస్త్రసందోహమున్

సరసాలోక సమూహమున్ నెఱపుచుం, జంద్రాస్య హేలాగతిన్.

భావము:

బంగారుకంకణాల ఝణఝణ ధ్వనులు, వింటినారీధ్వనితో కలసిపోగా; చెవికమ్మలకు పొదగిన మణుల ధగధగ కాంతులు, చెక్కిళ్ళ కాంతులపై వ్యాపింపగా; అందమైన క్రీగంటి చూపుల ధగధగ కాంతులు, బాణాల కాంతులను కప్పివేయగా; శరములు ప్రయోగించుట వలన కలిగిన ఘుమఘుమ శబ్దం, శత్రుసైన్యాల కలకల ధ్వనులను అణచివేయగా; వీరము, శృంగారము, భయము, రౌద్రము, విస్మయము అనే భావాలన్నీ కలసి ఈ భామగా రూపొందాయా అన్నట్లుగా సత్యభామ బాణం తొడగడం, లాగడం, ప్రయోగించడం గూడ గుర్తించరానంత వేగంగా బాణాలు వేస్తూ యుద్ధం చేయసాగింది. చంద్రముఖి సత్యభామ ఒక ప్రక్క కోపంతో కనుబొమలు ముడివేసి వీరత్వం మూర్తీభవించినట్లు కను లెఱ్ఱచేసి, వాడి బాణాలను ప్రయోగిస్తూ శత్రువు నరకాసురుడిని నొప్పిస్తోంది; మరొక ప్రక్క అనురాగంతో మందహాసం చేస్తూ శృంగారం ఆకారం దాల్చినట్లు సొంపైన కన్నులతో సరసపు చూపులు ప్రసరిస్తూ ప్రియుడైన శ్రీకృష్ణుడిని మెప్పిస్తోంది.

http://telugubhagavatam.org/?tebha&Skanda=10.2&Ghatta=20&Padyam=177

: : తెలుగులో మాట్లాడుకుందాం : :

: : భాగవతం చదువుకుందాం : :