తెలుగు భాగవత తేనె సోనలు – 213

కంటిగంటి

3-146-మత్త.

కంటిఁ గంటి భవాబ్ది దాటఁగ గంటి నాశ్రితరక్షకుం

గంటి యోగిజనంబు డెందము గంటిఁ జుట్టముఁ గంటి ము

క్కంటికిం గనరాని యొక్కటిఁ గంటిఁ దామరకంటిఁ జే

కొంటి ముక్తివిధానముం దలకొంటి సౌఖ్యము లందగన్.

          ఆహా! దర్శించాను; సందర్శించాను; సంసారసాగరాన్ని తరించాను; ఆశ్రితులను రక్షించే ఆ సర్వరక్షకుని దర్శించాను; మహాయోగుల ఆత్మబంధువును సందర్శించాను; మూడు కన్నులున్న మహేశ్వరునికి కూడ అంతుపట్టని అద్వితీయుని కనుగొన్నాను; పద్మాక్షుడు గోవిందుని చేరాను; ముక్తిమార్గాన్ని చేరుకున్నాను; పరమానందాన్ని అందుకున్నాను.

శ్రీకృష్ణనిర్యాణ ఘట్టంలో ఒక చెట్టుమొదట్లో ఆసీనుడైన స్వామిని కనుగొన్న ఉద్ధవుని ఉద్వేగం ఇది. ఈ మత్తకోకిల పద్యంలో ఉద్దవుడనే కోకిల కృష్ణదర్శనంతో మత్తెక్కి పారవశ్యంతో కూజితాలు చేస్తున్నాడు.

3-146-matta.

kaMTi@M gaMTi bhavaabdi daaTa@Mga gaMTi naaSritarakshakuM

gaMTi yOgijanaMbu DeMdamu gaMTi@M juTTamu@M gaMTi mu

kkaMTikiM ganaraani yokkaTi@M gaMTi@M daamarakaMTi@M jae

koMTi muktividhaanamuM dalakoMTi saukhyamu laMdagan.

          కంటిగంటి = చూసేను చూసేను; భవ = సంసారము అను; అబ్దిన్ = సాగరమును; దాటగన్ = దాటు విధానమును; కంటి = చూసితిని; ఆశ్రితరక్షకున్ = కృష్ణుని {ఆశ్రిత రక్షకుడు – ఆశ్రయించిన వారిని రక్షించు వాడు, కృష్ణుడు}; కంటి = చూసితిని; యోగిజనంబు డెందమున్ = కృష్ణుని {యోగిజనంబు డెందము - యోగుల మనసులో ఉండు వాడు, విష్ణువు}; కంటి = చూసేను; చుట్టమున్ = బంధువును; కంటి = చూసేను; ముక్కంటికిం గనరాని యొక్కటిన్ = కృష్ణుని {ముక్కంటికిం గనరాని యొక్కటి - శివునికి కూడ చూచుటకురాని ఏకేశ్వరుడు, విష్ణువు}; కంటి = చూసేను; తామర కంటిన్ = కృష్ణుని {తామర కంటి - పద్మములవంటి కన్నులు ఉన్న వాడు, విష్ణువు}; చేకొంటి = చేపట్టేను; ముక్తి విధానమున్ = కృష్ణుని {ముక్తి విధానము – ముక్తిని చేరు మార్గము, విష్ణువు}; తలకొంటి = చేరుకొన్నాను; సౌఖ్యములు = సౌఖ్యములు; అందగన్ = పొందగా.

http://telugubhagavatam.org/products.php?pg=9&cntstart=0&psid=716&catid=6&scatid=13

~~~|సర్వేజనాః సుఖినోభవంతు|~~~

తెలుగు భాగవత తేనె సోనలు – 212

ఆదిదేవుడైన

9-359-ఆ

ఆదిదేవుఁడైన యా రామచంద్రుని

కబ్ది గట్టు టెంత యసురకోటి

జంపు టెంత కపుల సాహాయ్య మది యెంత

సురల కొఱకుఁ గ్రీడ జూపెఁగాక.

       ఆ పురాణ పురుషుడు అయినట్టి శ్రీరామచంద్రుడు తలచుకుంటే సముద్రంమీద సేతువు కట్టడం, రాక్షసులు అందరిని చంపడం లాంటివి ఏమాత్రం పెద్ద పనులేం కావు కాని, దేవతల కోసం తన లీలలను ప్రదర్శించాడంతే.

9-359-aa

aadidEvu@M Daina yaa raamachaMdruni

kabdi gaTTu TeMta yasurakOTi

jaMpu TeMta kapula saahaayya madi yeMta

surala koRraku@M greeDa joope@M gaaka.

          ఆదిదేవుడు = మూలాధార /సృష్ట్ ఆది నుండి ఉన్న దేవుడు; ఐన = అయినట్టి; ఆ = ఆ; రామచంద్రుని = రామచంద్రుని; కిన్ = కి; అబ్ది = సముద్రమునకు; కట్టుట = సేతువు కట్టుట; ఎంత = ఎంతపాటి పని; అసుర = రాక్షస; కోటి = సమూహమును; చంపుట = సంహరించుట; ఎంత = అది ఎంత పని; కపుల = వానరుల; సాహాయ్యము = తోడు; అది = అది; ఎంత = ఎంతటిది; సురల = దేవతల; కొఱకున్ = కోసము; క్రీడ = లీలలు; చూపెన్ = చూపించెను; కాక = తప్పించి.

http://telugubhagavatam.org/products.php?pg=2&cntstart=0&psid=632&catid=6&scatid=25

~~~|సర్వేజనాః సుఖినోభవంతు|~~~