తెలుగు భాగవత తేనె సోనలు – 190

కాననివాని

7-182-ఉ.

కాననివాని నూఁత గొని కాననివాఁడు విశిష్ట వస్తువుల్

గానని భంగిఁ గర్మములు గైకొని కొందఱు కర్మబద్ధులై

కానరు విష్ణుఁ, గొంద ఱటఁ గందుఁ రకించన వైష్ణవాంఘ్రిసం

స్థాన రజోభిషిక్తు లగు సంహృత కర్ములు దానవేశ్వరా!

          ఓ రాక్షసేంద్ర! ఒక గుడ్డివాడు మరొక గుడ్డివాని తోడు తీసుకొని ఏ వస్తువును విశేషించి చూడలేడు. అదేవిధంగా మానవులు కర్మములను చేస్తూ, ఆ కర్మముల చేతనే బద్ధులయి విష్ణుమూర్తిని చూడలేరు. కొందరు పుణ్యపురుషులు మహాత్ములైన విష్ణుభక్తుల పాదపరాగలను ధరించి, కర్మలను త్యజించి, స్వామిని దర్శించ గలుగుతారు. అంతేగాని ఈ సంసార లంపటంలో కొట్టుమిట్టాడేవారు భగవంతుణ్ణి ఎన్నటికి దర్శించలేరు అంటు ప్రహ్లాదుడు తన తండ్రి హిరణ్యకశిపునికి వివరించాడు.

7-182-u.

kaananivaani noo@Mta goni kaananivaa@MDu viSishTa vastuvul

gaanani bhaMgi@M garmamulu gaikoni koMdaRu karmabaddhulai

kaanaru vishNu@M, goMda RaTa@M gaMdu@M rakiMchana vaishNavaaMghrisaM

sthaana rajObhishiktu lagu saMhRta karmulu daanavaeSvaraa!

          కానని = చూడలేని; వానిన్ = వానిని; ఊతన్ = ఊతముగ; కొని = తీసుకొని; కానని = గుడ్డి; వాడు = వాడు; విశిష్ట = శ్రేష్ఠమైన; వస్తువుల్ = వస్తువులను; కానని = చూడలేని; భంగిన్ = వలె; కర్మములున్ = కర్మలను; కైకొని = చేపట్టి; కొందఱు = కొంతమంది; కర్మ = కర్మలకు; బద్దులు = బద్ధమైనవారు; ఐ = అయ్యి; కానరు = చూడజాలరు; విష్ణున్ = నారాయణుని; కొందఱు = కొంతమంది; అటన్ = అక్కడ; కందురు = పొందెదరు; అకించన = గొప్పవా రైన; వైష్ణవ = విష్ణుభక్తుల; అంఘ్రి = పాదముల; సంస్థాన = తగిలిన; రజః = ధూళిచేత; అభిషిక్తులు = అభిషేకింపబడిన వారు; అగు = అయిన; సంహృత = విడిచిపెట్టిన; కర్ములు = కర్మములు గలవారు; దానవేశ్వరా = హిరణ్యకశిపుడ.

http://telugubhagavatam.org/products.php?pg=8&cntstart=0&psid=344&catid=6&scatid=23

~~~|సర్వేజనాః సుఖినోభవంతు|~~~