శ్రీ కృష్ణ విజయము - 78

( చాణూరునితో సంభాషణ )

10.1-1347-సీ.

రోషాగ్నిధూమప్రరోహంబు కైవడి-

  శిరమున సన్నపు శిఖ వెలుంగ

నాశామదేభేంద్ర హస్తసన్నిభములై-

  బాహుదండంబులు భయదములుగ

లయసమయాంతకోల్లసిత దంష్ట్రల భంగిఁ-

  జాఁగిన కోఱ మీసములు మెఱయ

నల్లని తెగఁగల నడకొండ చాడ్పున-

  నాభీల నీలదేహంబు వెలయఁ

10.1-1347.1-ఆ.

జరణహతుల ధరణి సంచలింపఁగ నభో

మండలంబు నిండ మల్ల చఱచి

శౌరి దెసకు నడచెఁ జాణూర మల్లుండు

పౌరలోకహృదయభల్లుఁ డగుచు.

భావము:

గగనమండలం నిండేలా భుజాలు చరిచిన చాణూర మల్లుడు, కోపమనే అగ్ని నుంచి ప్రసరించే సన్నని పొగ మాదిరిగా అతని తలపై పిలకజుట్టు ప్రకాశిస్తుండగా; దిగ్గజముల తొండాలకు సమానమైన పొడుగాటి చేతులు భీతిని కలిగిస్తుండగా; ప్రళయకాలం లోని యమధర్మరాజు పదునైన కోరల వలె పొడవైన కోరమీసాలు మెరుస్తుండగా; నల్లని నిడుపైన నడకొండలాగ భయంకరమైన నల్లని దేహం పెల్లుబుకుతుండగా; అడుగుల తాకిడికి నేల అదురి పోతుండగా; చూస్తున్న పట్టణ ప్రజల హృదయాలకు ఆ దృశ్యం బల్లెంలా తగులుతుండగా చాణూరమల్లుడు కృష్ణుడి వేపు నడిచాడు.

http://telugubhagavatam.org/?tebha&Skanda=10.1&Ghatta=159&padyam=1347

: : భాగవతం చదువుకుందాం : : 

: : తెలుగులో మాట్లాడుకుందాం : :