శ్రీ కృష్ణ విజయము - 73

( చాణూరునితో సంభాషణ )

10.1-1335-క.

జనములు నేర్చిన విద్యలు

జననాథునికొఱకుఁ గాదె? జననాథుఁడు నీ

జనములు మెచ్చఁగ యుద్ధం

బున మనముం గొంత ప్రొద్దు పుత్తమె? కృష్ణా!"

10.1-1336-వ.

అనిన విని హరి యిట్లనియె.

10.1-1337-ఉ.

"సాములు లేవు; పిన్నలము; సత్వము గల్దనరాదు; మల్ల సం

గ్రామ విశారదుల్ గులిశ కర్కశదేహులు మీరు; మీకడన్

నేము చరించు టెట్లు? ధరణీశుని వేడ్కలు చేయువారముం

గాము; వినోదముల్ సలుపఁ గాదనవచ్చునె యొక్కమాటికిన్.

భావము:

ఓయీ కృష్ణా! జనులు విద్యలు నేర్చుకోవడం మహారాజు మెప్పు కోసమే కదా! ప్రభువూ, ఈ ప్రజలూ మెచ్చుకొనేలా మనం మల్లయుద్ధంతో కొంత కాలక్షేపం చేద్దామేం?” వాడు అలా అనగా వినిన కృష్ణుడు ఇలా అన్నాడు. “మాకు సాములు తెలియవు. మేము చిన్నవాళ్ళం. సత్తా ఉందని చెప్పలేము. మీరేమో కుస్తీపట్లలో నిష్ణాతులు. వజ్రాయుధం లాంటి కరుకైన శరీరాలు కలవారు. ఇలాంటి మీతో మేము ఎలా తలపడాలి. మీ రాజుగారికి వినోదం కలిగించే వాళ్ళము కాము కానీ, ఆడదామని ఆహ్వానిస్తే ఎప్పుడైనా కాదని అనరాదు కదా!

http://telugubhagavatam.org/?tebha&Skanda=10.1&Ghatta=159&padyam=1337

: : భాగవతం చదువుకుందాం : : 

: : తెలుగులో మాట్లాడుకుందాం : :