దక్ష యాగము - 2

(ఈశ్వర దక్షుల విరోధం)

4-36-సీ.

"చతురాత్మ! దుహితృవత్సలుఁడైన దక్షుండు;

దన కూఁతు సతి ననాదరము చేసి

యనయంబు నఖిలచరాచర గురుఁడు ని;

ర్వైరుండు శాంతవిగ్రహుఁడు ఘనుఁడు

జగముల కెల్లను జర్చింప దేవుండు;

నంచితాత్మారాముఁ డలఘుమూర్తి

శీలవంతులలోన శ్రేష్ఠుండు నగునట్టి;

భవునందు విద్వేషపడుట కేమి

4-36.1-తే.

కారణము? సతి దా నేమి కారణమున

విడువరానట్టి ప్రాణముల్ విడిచె? మఱియు

శ్వశుర జామాతృ విద్వేష సరణి నాకుఁ

దెలియ నానతి యిమ్ము సుధీవిధేయ!"

భావము:

“చతురస్వభావం కలవాడా! సజ్జనవిధేయా! తన పుత్రికలపై ప్రేమ గల దక్షుడు సతీదేవిని ఎందుకు అవమానించాడు? సమస్త చరాచరాలకు గురువు, ఎవరినీ ద్వేషింపనివాడు, ప్రశాంతమూర్తి, మహానుభావుడు, ఎల్ల లోకాలకు దేవుడు, ఆత్మారాముడు, విశ్వేశ్వరుడు, శీలవంతులలో అగ్రేసరుడు అయిన మహాదేవుని దక్షుడు ద్వేషించడానికి కారణం ఏమిటి? ఏ కారణంగా సతీదేవి తన ప్రాణాలు విడిచింది? మామయైన దక్షునికి, అల్లుడైన శివునికి విరోధం ఎలా సంభవించింది? నాకు ఈ కథను దయచేసి సెలవీయండి.”

http://telugubhagavatam.org/?tebha&Skanda=4&Ghatta=5&padyam=36

: :  భాగవతం చదువుకుందాం : : 

: : తెలుగులో మాట్లాడుకుందాం : :