మధురిమలు – పదలాలిత్యము

మ.

పదలాలిత్యము పాకశుద్ధి భగవత్భక్తాగ్ర సంసేవ్యమున్

పదమత్యున్నతమున్ మహాశుభదమున్ పద్మోద్భవానందమున్

చిదచిద్రూపవిభాగ భాగవతమున్ చింతింతు నాంధ్రంబుగా

సదయం జెప్పిన పోతరాజు పదముల్ సత్ప్రేమ నే మ్రొక్కెదన్.

- చిదంబరకవి, అంగదరాయబారము

          మన తెలుగు భాగవతము పదలాలిత్యముతో తొణికిసలాడునది; చక్కటి పాకశుద్ధి కలది; భగవద్భక్త శ్రేష్ఠులచే సేవింబడునది; మిక్కిలి ఉన్నత స్థాయి కలది; గొప్ప శుభాలను అందించునది; బ్రహ్మానందము కలిగించునది; చిత్తు అచిత్తు భేదము లను తెలుపునది. అట్టి తెలుగు భాగవతమును సదా అధ్యయనం చేసుకొనెదను. తెలుగు వారిపై దయతో దానిని ఆంధ్రీకరించిన బమ్మెర పోతన పాదములకు నేను నమస్కరిస్తాను. అని చిదంబర కవి అంగద రాయబారము రచనలో కీర్తించాడు.

http://telugubhagavatam.org/

~~~|సర్వేజనాః సుఖినోభవంతు|~~~