శ్రీ కృష్ణ విజయము - 89

( కంస వధ )

10.1-1376-క.

తమగమున కెగురు యదు స

త్తమగణ్యునిఁ జూచి ఖడ్గధరుఁడై యెదిరెం

దమ గమివారలు వీరో

త్తమగణవిభుఁ డనఁగఁ గంసధరణీపతియున్.

10.1-1377-శా.

పక్షీంద్రుం డురగంబుఁ బట్టు విధ మొప్పన్ గేశబంధంబు లో

క క్షోభంబుగఁ బట్టి మౌళిమణు లాకల్పాంతవేళాపత

న్నక్షత్రంబుల భంగి రాల రణసంరంభంబు డిందించి రం

గక్షోణిం బడఁద్రొబ్బెఁ గృష్ణుఁడు వెసం గంసున్ నృపోత్తంసునిన్.

భావము:

తానున్న గద్దెమీదకి ఎగిరి దూకుతున్న యాదవ మహావీరుడు శ్రీకృష్ణుడిని చూసి మథురను ఏలే కంసుడు ఖడ్గాన్ని చేపట్టి ఎదిరించాడు అతని పక్షంలోని వారంతా కంసుడు గొప్పవీరుడైన ప్రభువు అని ప్రశంసించారు. పక్షులకు ప్రభువైన గరుత్మంతుడు పామును ఎలా పట్టుకుంటాడో, అలా శ్రీకృష్ణుడు కంసుడి జుట్టుముడి పట్టుకున్నాడు. సభలోని జనులంతా భయభ్రాంతులు అయ్యారు. ప్రళయకాలంలో నక్షత్రాల మాదిరి అతని కిరీటంలోని మణులు జలజల నేలరాలిపోయాయి. కంస మహారాజు యుద్ధ సన్నాహం అణగించి, యదువల్లభుడు మల్లరంగస్థలంమీదకి పడద్రోసాడు.

http://telugubhagavatam.org/?tebha&Skanda=10.1&Ghatta=164&padyam=1377

: : భాగవతం చదువుకుందాం : : 

: : తెలుగులో మాట్లాడుకుందాం : : 

శ్రీ కృష్ణ విజయము - 88

( చాణూర ముష్టికుల వధ )

10.1-1373-ఉ.

"వల్లవబాలురన్ నగరి వాకిటికిన్ వెడలంగఁ ద్రొబ్బుఁ; డీ

గొల్లల ముట్టికోల్ గొనుఁడు; క్రూరుని నందునిఁ గట్టు; డుర్వికిం

దెల్లముగాఁగ నేడు వసుదేవునిఁ జంపుఁడు; తండ్రి గాఁడు వీఁ

డెల్లవిధంబులం; బరుల కిష్టుఁడు కావకుఁ డుగ్రసేనునిన్."

10.1-1374-వ.

అని పలుకు సమయంబున.

10.1-1375-శా.

జంఘాలత్వముతో నగోపరి చరత్సారంగ హింసేచ్ఛను

ల్లంఘింపన్ గమకించు సింహము క్రియన్ లక్షించి పౌరప్రజా

సంఘాతంబులు తల్లడిల్ల హరి కంసప్రాణహింసార్థి యై

లంఘించెం దమగంబు మీఁదికి రణోల్లాసంబు భాసిల్లఁగన్.

భావము:

భావము:

“ఈ గొల్లపిల్లలను నగరద్వారం బైటకి పడిపోయేలా నెట్టేయండి. ఈ యాదవులను ముట్టడించండి. క్రూరుడైన నందుణ్ణి బంధించండి. లోకానికి వెల్లడి అయ్యేలా, ఇప్పుడే వసుదేవుణ్ణి చంపివేయండి. ఈ ఉగ్రసేనుడు నాకు తండ్రి కాడు. అన్నివిధాలా శత్రువుకు ఇష్టమైనవాడు. వాడిని కాపాడకండి.” ఇలా కంసుడు యాదవులను ముట్టడించమని అంటుండగా.కొండశిఖరాన తిరిగే జింకను చంపడానికి, పిక్కబలంతో కుప్పించి దూకే సింహకిశోరం లాగున, శ్రీకృష్ణుడు కంసుని సంహరించాలని తలచినవాడై గురి చూసి మంచె మీదికి యుద్ధోత్సాహంతో దూకాడు. కొలువులో ఉన్న ప్రజలు అందరూ తల్లడిల్లారు.

http://telugubhagavatam.org/?tebha&Skanda=10.1&Ghatta=163&padyam=1373

: : భాగవతం చదువుకుందాం : : 

: : తెలుగులో మాట్లాడుకుందాం : : 

శ్రీ కృష్ణ విజయము - 87

( చాణూర ముష్టికుల వధ )

10.1-1370-క.

"వల్లవబాలకు లని మన

మల్లవరులు పెనఁగి నేడు మడిసిరి వీరల్

బల్లిదులు; తలఁడు తలఁ" డని

చెల్లాచెదరైరి పాఱి చిక్కిన మల్లుల్.

10.1-1371-ఉ.

మల్లురఁ జంపి గోపక సమాజములో మృగరాజు రేఖ శో

భిల్లఁగఁ బాదపద్మములఁ బెల్లుగ నందెలు మ్రోయ వచ్చు నా

వల్లవరాజనందనుల వారక చూచి మహీసురాదు ల

ల్లల్లన సంస్తుతించిరి ప్రియంబుగఁ గంసుఁడు దక్క నందఱున్.

10.1-1372-వ.

అంత సభాజనంబుల కలకలంబు నివారించి మంత్రులం జూచి కంసుం డిట్లనియె.

భావము:

కేవలం గోపాలబాలకులు అనుకుని వారితో యుద్ధం చేసి మన మల్లశ్రేష్ఠులు మరణించారు. ఈ రామకృష్ణులు చాలా బలవంతులు. “దూరంగా పొండి” అంటూ తక్కిన మల్లురు అందరూ చెల్లాచెదరై పారిపోయారు. గొల్లలరాజైన నందుడి నందనులు మల్లులను చంపి గొల్లలమధ్య సింహాలలా ప్రకాశిస్తూ, అందెలు మ్రోగుతున్న అడుగుదామరలతో అడుగులు వేస్తూ వస్తుంటే, ఒక్క కంసుడు తప్పించి బ్రాహ్మణులు మొదలైన వారు అందరూ రెప్పవాల్చక చూసి ప్రీతితో పొగడారు. అప్పుడు సభాసదుల కోలాహలాన్ని నివారించి కంసుడు తన మంత్రులను చూసి ఇలా అన్నాడు.

http://telugubhagavatam.org/?tebha&Skanda=10.1&Ghatta=163&padyam=1371

: : భాగవతం చదువుకుందాం : : 

: : తెలుగులో మాట్లాడుకుందాం : : 

శ్రీ కృష్ణ విజయము - 86

( చాణూర ముష్టికుల వధ )

10.1-1366-ఆ.

త్రిప్పి నేలవైవ దిగ్గన రక్తంబు

వదనగహ్వరమున వఱదవాఱ

ముష్టికుండు ఘోరముష్టి సత్వము చెడి

గూలె గాలిఁ దరువు గూలునట్లు.

10.1-1367-వ.

మఱియును.

10.1-1368-క.

పాటవమునఁ బలుపిడికిట

సూటిం బడఁబొడిచె బలుఁడు శోభిత ఘన బా

హాటోప నృపకిరీటుం

గూటున్ వాచాటు నధిక ఘోర లలాటున్.

10.1-1369-వ.

అంత న ద్దనుజాంతకుండు చరణప్రహరణంబుల భిన్నమస్తకులం జేసి వాని చెలుల నంతకాంతికంబున కనిచిన.

భావము:

బలరాముడు అలా గిరగిరా త్రిప్పి నేలమీదకి దబ్బున పడవేయడంతో ముష్టికుడి గుహలాంటి నోటినుంచి రక్తం వరదలై పారింది. బలరాముడి ఘోరమైన ముష్టిఘాతంతో ముష్టికుడు సత్తువ కోల్పోయి, పెనుగాలికి మహా వృక్షం కూలునట్లు, కూలిపోయాడు. ఇంకా గొప్ప భుజబలాటోపంతో రాజునకు ముఖ్యమైన వాడూ, పరమ వదరుబోతూ, మిక్కిలి భయంకరమైన నుదురు కలవాడూ అయిన కూటుడు అనే మల్లుడిని బలభద్రుడు దిటవైన తన పిడికిలితో సూటిగా పడబొడిచాడు. అటుపిమ్మట, రాక్షసుల పాలిటి యముడైన బలరాముడు, వాడి మిత్రులైన తోసలుడు శలుడు అనే వారిని తన కాలితాపులతో తలలు పగలకొట్టి, యముడి దగ్గరకు పంపేసాడు.

http://telugubhagavatam.org/?tebha&Skanda=10.1&Ghatta=163&padyam=1368

: : భాగవతం చదువుకుందాం : : 

: : తెలుగులో మాట్లాడుకుందాం : : 

శ్రీ కృష్ణ విజయము - 85

( చాణూర ముష్టికుల వధ )

10.1-1363-క.

శౌరి నెఱిఁజొచ్చి కరములఁ

గ్రూరగతిం బట్టి త్రిప్పి కుంభిని వైచెన్

శూరుం గలహ గభీరున్

వీరుం జాణూరు ఘోరు వితతాకారున్.

10.1-1364-క.

శోణితము నోర నొలుకఁగఁ

జాణూరుం డట్లు కృష్ణ సంభ్రామణ సం

క్షీణుండై క్షోణిం బడి

ప్రాణంబులు విడిచెఁ గంసు ప్రాణము గలఁగన్.

10.1-1365-క.

బలభద్రుండును లోకులు

బలభద్రుం డనఁగఁ బెనఁగి పటుబాహుగతిన్

బలభేది మెచ్చఁ ద్రిప్పెను

బలవన్ముష్టికునిఁ గంసు బలములు బెగడన్.

భావము:

పరాక్రమవంతుడూ, యుద్ధమందు గంభీరుడూ, భీతిగొలిపేవాడూ, దొడ్డ దేహం కలవాడూ, వీరుడూ అయిన చాణూరుడిని కృష్ణుడు చొరవగా చొచ్చుకుపోయి కర్కశంగా వాడి చేతులు పట్టుకుని గిరగిర త్రిప్పి నేలపై పడదోసాడు. అలా కృష్ణుడిచేత గిరగిర త్రిప్పబడిన చాణూరుడు బలమంతా క్షీణించినవాడై నోటిలోనుండి రక్తం కారుతుండగా నేలమీద పడి ప్రాణాలు విడిచాడు. అతడి ప్రాణం పోడంతో కంసుడి ప్రాణం కలతబారింది. “బలభద్రుడు నిజంగా బలంలో భద్రుడే” అంటూ లోకులు అంటూండగా; బలాసురుని సంహరించిన ఇంద్రుడు “మేలు మే” లని మెచ్చుకోగా; బలరాముడు అపారమైన బాహుబలంతో బలవంతుడైన ముష్టికుడిని పట్టుకుని గిరగిరా త్రిప్పాడు. అది చూసిన కంసుడి సేన బెదిరిపోయింది.

http://telugubhagavatam.org/?tebha&Skanda=10.1&Ghatta=163&padyam=1365

: : భాగవతం చదువుకుందాం : : 

: : తెలుగులో మాట్లాడుకుందాం : : 

శ్రీ కృష్ణ విజయము - 84

( చాణూర ముష్టికుల వధ )

10.1-1361-క.

ధృతిచెడి లోఁబడె మల్లుం

డతులిత భవజలధితరికి హతరిపు పురికిన్

జితకరికిన్ ధృతగిరికిం

దత హరిరవ భరిత శిఖరిదరికిన్ హరికిన్.

10.1-1362-క.

హరికిని లోఁబడి బెగడక

హరి యురము మహోగ్రముష్టి నహితుఁడు పొడువన్

హరి కుసుమమాలికాహత

కరి భంగిఁ బరాక్రమించెఁ గలహోద్ధతుఁడై.

భావము:

సాటిలేని సంసారసాగరాన్ని దాటడానికి నావ వంటివాడూ; శత్రుపురాలను ధ్వంస మొనర్చినవాడూ; కువలయాపీడ గజాన్నిఓడించినవాడూ; గోవర్ధనగిరిని ఎత్తినవాడూ; గొప్ప సింహగర్జనతో పర్వత గుహలను పూరించినవాడూ అయిన శ్రీకృష్ణునికి చాణూరుడు ధైర్యంచెడి లోబడిపోయాడు. విరోధి చాణూరుడు కృష్ణుడికి లోబడినప్పటికీ, భయపడక అతడి రొమ్ముపై మహా భయంకరమైన పిడికిలిపోటు పొడిచాడు. పూదండచే కొడితే ఏనుగు లెక్కచెయ్యని విధంగా, వాడి పోటును లెక్కచేయక శ్రీహరి విజృంభించి ఆ పోరులో పరాక్రమం చూపించాడు.

http://telugubhagavatam.org/?tebha&Skanda=10.1&Ghatta=163&padyam=1362

: : భాగవతం చదువుకుందాం : : 

: : తెలుగులో మాట్లాడుకుందాం : :

శ్రీ కృష్ణ విజయము - 83

( పౌరకాంతల ముచ్చటలు )

10.1-1357-క.

గోపాలకృష్ణుతోడను

గోపాలన వేళలందుఁ గూడి తిరుగు నా

గోపాలు రెంత ధన్యులొ

గోపాలుర కైన నిట్టి గురురుచి గలదే?

10.1-1358-క.

శ్రమజలకణసిక్తంబై

కమలదళేక్షణుని వదనకమలము మెఱసెన్

హిమజలకణసిక్తంబై

కమనీయం బగుచు నున్న కమలము భంగిన్.

10.1-1359-ఆ.

సభకుఁ బోవఁ జనదు; సభవారి దోషంబు

నెఱిఁగి యూరకున్ననెఱుఁగకున్న

నెఱిఁగి యుండియైన నిట్టట్టు పలికినఁ

బ్రాజ్ఞుఁ డైనఁ బొందుఁ బాపచయము."

10.1-1360-వ.

అని పెక్కండ్రు పెక్కువిధంబులం బలుకుచుండఁ దద్బాహు యుద్ధంబున.

భావము:

గోవులను మేపే సమయంలో గోపాలకృష్ణుడితో కలసిమెలసి తిరిగే ఆ గోపాలకు లెంత పుణ్యాత్ములో ఎంతటి ప్రభువులకైనా ఇంతటి గొప్ప అనుభవం దక్కదు కదా. మంచునీటి చుక్కలతో తడిసి మనోహరంగా ఉండే పద్మం వలె కలువరేకుల వంటి కన్నులు కల కృష్ణుని ముఖకమలం చెమటబిందువులతో తడిసి ప్రకాశిస్తున్నది. సభకు వెళ్ళరాదు. వెళితే సభలోనివారు చేసే దోషాలు తెలిసి ఉపేక్షించరాదు, ఆ దోషాలు తెలుసుకోలేకపోయినా, దోషాలు తెలిసి కూడా న్యాయవిరుద్ధంగా పలుకరాదు. లేకపోతే, ఎంతటి పండితుడి కైనా ఆ పాపం పట్టుకు తీరుతుంది.” ఇలా ఎందరో పురస్త్రీలు రకరకాలుగా పలుకుతుండగా ఆ ముష్టి యుద్ధంలో. . .

http://telugubhagavatam.org/?tebha&Skanda=10.1&Ghatta=162&padyam=1359

: : భాగవతం చదువుకుందాం : : 

: : తెలుగులో మాట్లాడుకుందాం : :