ప్రహ్లాదుని జన్మంబు - ఆచార్యోక్తము

7-260-శా.

ఆచార్యోక్తము గాక బాలురకు మోక్షాసక్తిఁ బుట్టించి నీ

వాచాలత్వముఁ జూపి విష్ణు నహితున్ వర్ణించి మ ద్ధైత్య వం

శాచారంబులు నీఱు చేసితివి మూఢాత్ముం గులద్రోహి నిన్

నీచుం జంపుట మేలు చంపి కులమున్ నిర్దోషముం జేసెదన్.

టీకా:

          ఆచార్య = గురువుచేత; ఉక్తము = చెప్పబడినది; కాక = కాకుండగ; బాలుర = పిల్లల; కున్ = కు; మోక్ష = ముక్తిపదమందు; ఆసక్తిన్ = ఆసక్తిని; పుట్టించి = కలిగించి; నీ = నీ యొక్క; వాచాలత్వమున్ = వాగుడును; చూపి = చూపించి; విష్ణున్ = హరిని; అహితున్ = శత్రువును; వర్ణించి = పొగడి; మత్ = నా; దైత్య = రాక్షస; వంశ = కులపు; ఆచారంబులున్ = ఆచారములను; నీఱు = బూడిద; చేసితివి = చేసితివి; మూఢాత్మున్ = మూర్ఖుడను; కుల = వంశమునకు; ద్రోహిన్ = ద్రోహము చేయువాడను; నిన్ = నిన్ను; నీచున్ = నీచుడను; చంపుట = సంహరించుట; మేలు = మంచిది, ఉత్తమము; చంపి = సంహరించి; కులమున్ = వంశమును; నిర్దోషమున్ = దోషములేనిదిగా; చేసెదన్ = చేసెదను.

భావము:

            ఆచార్యులు చెప్పింది నువ్వు వినటంలేదు. పైగా నీ తోటి విద్యార్థులకు కైవల్యం మీద కాంక్ష పుట్టిస్తున్నావు; నీ వాచాలత్వం చూపించి మన విరోధి విష్ణువును విపరీతంగా పిచ్చిమాటలతో పొగడుతున్నావు; మన రాక్షస వంశ సంప్రదాయాలు అన్నీ బూడిదపాలు చేశావు; నువ్వు కులగ్రోహివి; మూఢుడివి; నీచుడివి; నీవంటి వాడిని చంపడమే మంచిపని. నిన్ను చంపి నా వంశానికి మచ్చరాకుండా చేస్తాను.

७-२६०-शा.

आचार्योक्तमु गाक बालुरकु मोक्षासक्तिँ बुट्टिंचि नी

वाचालत्वमुँ जूपि विष्णु नहितुन् वर्णिंचि म द्धैत्य वं

शाचारंबुलु नीर्रु चेसितिवि मूढात्मुं गुलद्रोहि निन्

नीचुं जंपुट मेलु चंपि कुलमुन् निर्दोषमुं जेसेदन्.

http://telugubhagavatam.org/?tebha&Skanda=7&Ghatta=8&Padyam=260.0

: :చదువుకుందాం భాగవతం; బాగుపడదాం మనం అందరం: :